అతడు ఆమె —- ఆ బంధం

అతడు ఆమె —- ఆ బంధం

అతను ప్రేమిస్తున్నానన్నాడు
ఆమె అపనమ్మకంగా చూసింది
నువ్వే ప్రాణం, నీతోనే జీవితమన్నాడు
ఆమె మనసు కరిగి, ప్రేమ ఉప్పొంగింది
బంధం ముడిపడింది…..

చట్టాపట్టాలేసుకుని
జీవితపు నావలో
ఆనందపు తీరాలకు చేరాలని
కలలు కంటూ
సాగారు కొంత కాలం….

 

 

అలల ఆటుపోటులు
కలలను కుదపటం మొదలుపెట్టాయి
అతనిలో అసంతృప్తి రాచుకుంది
ఆమెలో నిర్లిప్తత చేరుకుంది
అతని కళ్ళు క్రోధాన్ని కురిపిస్తున్నాయి
ఆమె సహనం కన్నీటిగా కారుతోంది
అతను మౌనాన్ని ఆశ్రయించాడు
ఆమె మాటలు సతాయింపులయ్యాయి……

అతను ఆమె ఘర్షణలో
ఓ నడిరేయి ఆ నడిసముద్రంలో
జారిపోతున్న అతని చెయ్యందుకున్న
ఆమె కళ్ళలో
అదే అపనమ్మకం
ఆనాడు ప్రేమ కాదేమో
ఈనాడు ప్రేమ కాదా? లేదా?…..

ఆమె రెప్పల మాటున
ఎగిసి పడుతున్న జ్వాలలో
మరేదో మాట
నీకు ఈత రాదనీ కాదు
నేను తీరం చేరలేననీ కాదు
తీరని బంధం
కాదనలేని అనుబంధం….

అతని బుర్రే ఆలోచించిందో
మనసే కలుక్కుమందో
నీరు చేరిన నావలో
చేద వేస్తున్న భార్య
చెయ్యందుకున్నాడు……