వెలుగు కోసం వెతుకులాట

వెలుగు కోసం వెతుకులాట

  

  

చీకటిని చీల్చుతూ,

వెలుగు కోసం వెతుకులాట,

వెలుగు ఓ వింత,

ఆమడ దూరంలో కానవస్తూ,

అలసి సొలసి పోయినా,

అందుకోలేని ఆగమ్యగోచరం.

 

చిమ్మ చీకటిలో,

లాంతరు చేతబట్టి,

వెలుతురని భ్రమపడి,

భ్రమలో బతికేస్తూ,

ఏనాటికో భ్రమలు తొలిగి,

నిజం నిక్కచ్చిగా నిలదీసే వరకు,

కాలం కరిగిపోతూ,

జీవనం సాగుతూనే ఉంటుంది.

 

నిజం నిజమని తెలిసిన నాడు,

భూభ్రమణం ఆగిపోదు,

బతుకు సమరం సమసిపోదు,

కేవలం కలవరిపడి,

కలవరానికి అలవాటుపడి,

కోసుల దూరంలోని వెలుగు కోసం,

ఆమడ దూరాలు దాటుతూ,

శ్రమను ఓర్చుకుంటూ,

ఆశను బతికించుకుంటూ,

వెలుగు కోసం అసలు వెతుకులాట మొదలు,

కరిగిన కాలం కరిగిపోగా,

కరగని కాలం కాంతివంతంగా,

కరిగించుకుంటూ వెలుగు కోసం వెతుకులాట.